Allahabad Mizo Christian Fellowship
   
  Allahabad Mizo christian Fellowship
  Sermon/Article(Mizo)
 

Nausen Isua  chibai buk tute:  

(Mt.2:1-12;16-18  Lk.2:1-20)

                                                                           H.Laldanmawia

 Vawiin  hian Krismas kan hmang hmasa a ni ber a,Advance Krismas hmangtu zawng zawngte chibai ka buk a che u.Chanchintha mathaia leh Luka ziahah hian Isua pianna chibai buk tute mi in ang lo tak tak kan hmu a.Heng mite atang hian kum 2007 Krismas lo thleng tura Lal Isua a pian kan lawmna turah zir tur kan nei ang tih ka ring a.Keimahni nun theuh ah lak luh tum turin ka in chah hmasa duh a ni.
.Beram Pute:Beram Pute chauh ni lovin,Juda ho zawng zawng hian beisei leh nghahfak an nei a.Chu an nghahfak chu-Zawlneite lo puan lawk ‘MESSIA’lokal tur hi a ni a.Beram pute pawh hian nghakhlel takin Messia lokal tur leh Messia Lal Ram lo thleng turte anmahni awp bettu te laka chhuah tu tur chu an nghakhlel hle a ni.Tute nge beram pute chu?sawi dan hrang hrang a awm awm e.Mi hnuaihnung an ni tih hi sawi dan tlang lawn tak chu a ni awm e.Mi hnuaihnung hi an chiah em le?Sawi dan dang leh chu Mihausa mahni beram enkawltu tih hi ani leh a.Hei pawh hi a dik chiah em?A dang leh chu Temple a inthawina tur Beram veng tute an ni e tih hi an ni leh a.Hei pawh hi a dik chiah em le?A tua pawh chu lo nise…Nausen chibai an buk tih chinah hian duh tawk phawt ila.Kan chhinchhiah tur atana ka han sawi duh lai tak chu Engkim an kalsan tih lai tak hi a ni.An hna in a tuar dawn em tih an ngaihtuah chang lo.Nausen Isua pian thu an hriat khan an ei zawnna an kalsan nghal a,Nausen Isua chibai buk turin an kal nghal a nih kha.Kalsan neih huam lo tan Nausen Isua chibai a buk theih loh.

Vawin ah hian enge kan kalsan ve ang le?Sawi tur tam tak a awm thei ang.Kan bialnu/bialpa ten tih an duh kha kan tan tih a rem tawh lo,chung hun ah chuan kan bialnu/bialpa te kalsan a ngai mai thei.Urlawk zanah kan hmui tur kha kohhran programme leh KTP programme avang ten kalsan a ngai mai thei bawk.Ruihtheihthil chi hrang hrang kan sum sen ve ngaihna awm miah lo te pawh kan tawng mai thei bawk.Nula/tlangval hmeltha a ruka kan lo star em em te  nen pawh chetsual hial theihna rem chang pawh kan tawng mai thei.Kan chan tur khawvel thil hrang hrang te hi kan kalsan ngam a ngem le?Vawinah hian heng kan han sawi takte leh sawi loh atangte pawn kan hmaah hengte hi lo awm ta se,Beram puten engkim an kalsan ang hian kan kalsan ngam ve a ngem?

Isua pian champha hmang tute hian berampu te ang in hrethiam in hmu fiah ve ila,kan lawmin kan hlim anga,Pathian faka zai nuam kan ti ve ngei ang.Benga hriatna mai lova,thlarauva hmuh fiah a ngai ani.

.Mifingte:
Chanchintha ziak tute zingah mathaia chauhin nausen Isua chibai buk tura mifingte lo kal thu a sawi a.Mifingte hi eng zat nge tih a chuang lova,an thil pek chi thum avangin mi pathum ni tura ngaihna a awm a.Khawchhak lam thu rochhiah chuan mi 12 niin a sawi thung.Mathaia hian khawi atanga lokal nge an nih pawh a sawi lova,Persia,Arabia leh Messopotamia atangte a lokal ni a sawi te pawh a awm a ni.Mifingte chu tunlai  scientist kan tih mithiam,thil awm tan hun leh awm dante chhuia hre tute an ni a.Van lam thil ni leh thla leh arsi chanchin te pawh an hria a ni.Hmanlai chuan miropui pian dawnin Arsi dang lam bik awm thin ni a sawi a ni.Mifing ten Arsi dang lam bik an hmuh velah Juda te beisei Messia a lo piang ta niin an ring a niang,Jerusalem khua ah kalin,”Khawiah nge Juda te Lal lo piang chu?”tiin an zawt a.Amah chibai buk an tum tih an sawi nghal a ni.

Jerusalem khua miten an hrilh theih loh avangin an Arsi hmuh kha zuiin an kal leh a.Isua pianna hmun ngeiah an chhui lut ta a ni.An rin ang ngei a nausen Isua an hmuh avangin thilpek hlu tak tak pe in chibai an buk a,Rangkachak-Lalna entirna te,Beraw-Puithiam nihna entirna te,Murra-Ruang hnawih a hman thin te an pe a ni.

Vawin hian thil pahnih han tar lan ka duh a.Mifingte hian an thiam an finna hmangin Isua an zawng.Kan Pathian chuan mifing finna ka ti bo ang,Remhre remhriatna ka ti bo ang,a tih angin,mifing te pawh an thiam an finna hmanga hruai bo an nih kha.En tur tak Isua en lovin an kal a,kawng an bo a nih kha.Isua tel lo nun chuan nun kawng bo ah min hruai thin.Khawi kawng nge kan zawh ve le?A dang leh chu-An Ro bawm an hawng tih lai hi kan chhinchhiah tur pawimawh tak a ni awm e.An neih sum leh pai ui hauh lovin Isua tan an hlan a,Isua tan an in seng so a ni.Eng angin nge kan in senso ve le?Isua en chungin kal ila,kan thiam kan finna Isua tan i hlan ve ang u.Kan neih zawng zawng nen Isua hnen pan ila,CHIBAI i buk ve ang u.

LAL HERODA:
Heroda hi Heroda liana ti a sawi thin a ni a.B.C.73 velah a piang a,mi til ti thei tak a ni.Rom senate in Juda teLal tih  hming an pe  a,chu ta tang chuan Judai Ram hi kum 33 chhung lai a awp a ni.

Heroda hian Puithiam Lal fanu Mifiami nupui atan a nei a.Mahse thikthu chhiat vangin a that a.A fapa upa ber leh midang engemaw zat a that bawk.Chuvang chuan Rom Lalber Augustus chuan ‘Heroda fapa nih ai chuan a vawk nih pawh a him zawk ‘a ti hial a ni.A thih dawn hnaihah pawh Jerusalem a milian leh mitha ho a tan tir a,a thih velah thah ve nghal turin thu a pe nghal ani, an ti.Hetia a tihna chhan chu a thih in tuman an ui a ring lova,a thih ruala midang an thih khan sunna a awm theih nan a ti a ni.Mifing te hnen atanga Lal thar piang a hriat veleh itsikna in a khat a,nausen piang chu chibai buk ve a duh tih mifingte a hrilh a.Engmah a hriat tak loh avangin nuasen piang hlim kum hnih chin a that ta a.Hlaphuahtu chuan-chibai bukna rapthlak tiin a sawi hial anih kha.

Heroda anga misual mi thah pawisa lo hnenah pawh chhandamtu Isua pian thu hi hriattir tho a ni a,chu chuan Isua chanchintha hi mitin tan a ni tih a entir a ni.Heroda chuan itsikna leh vervekna a khatin Isua chibai buk a tum a,chibai bukna rapthlak a hlan ta.Kan Krismas hman dante kan in en nawn fo a tul awm e.Vervekna leh itsikna nen te kan hmang ve em le?Remna Lal hi,Remna Lal anih ang takin chibai buk tura kan inbuatsaih a tul hle mai.

Chibai bukna rapthlak pek tumin nawmchenna leh chakna zawngin hun kan hmang em?Krismas vuak vet kan hmanna hian min hampuar in,zahthlak tak leh mualpho tak hian chibai kan lo buk ve hlauh dah a nge.

Khualbuk vengtu
: Isua pianna hmun tur atan a lo ruat lawk ve rauh rauh chu,sum it a duham na avangin a hralh ta hlauh mai le!Isuan thlen na atan khualbuk chu a rawn dil ve a,mahse Isua a hre si lo,Isua a hnar ta.

Vawin hian khualbuk vengtu ang hian sualin min bawm a,Isua hi kan hnar fo mai a ni ti raw?Isua hi hnawk kan ti a,a tello hian hun hman kan duh zawk a,kan hnar fo thin.Krismas hmang tur a kan in buatsaihna ah hian,kan programme duan lawkah hian Isua kan telh ve em le?Isua lengin hmun i zuah ve ang u.

Berampu ten engkim kalsan in Nausen Isua chibai buk turin an kal a,Nausen chibai an buk.Mifing ten an Robawm hawngin Lal thar lo piang chu chibai an buk bawk a.Heroda chuan chibai bukna rapthlak a hlan.Khualbuk vengtu chuan Isua a lo hai a,chibai buk nan Isua a lo hai anih kha!Keini hian eng angina nge Isua hi chibai kan buk ve le?Thinlung a lamah hawn ila,ro thil dang a ngai tawh lo.

Kan kut riangte hi Nausen Isua chibai buk nan hmang ila,a duh ang a a hman turin hlan ila,kalsan neih huam in,midang tan malsawmna thlentu ni turin I in buatsaih ang u.

Lei leh van in rem tawh lo in rem leh nan Lal Isua a lokal;Remna siamtu ni turin Lal thar ISUA chibai i buk ve ang u

Tlangkawmna:
He hlimna hun pui hi i theih tawpin ur la,inbuatsaih la,chen rawh.Hlim takin.i thiante pawhin an duh duh in chen rawh se.Nang erawh chuan nakina i in chhir lehna turin engmah ti ve suh.Krismas chu ni khat chauh a ni.Mahse i hman fuh loh chuan kum a lo thar anga,in chhirna nen kum bul i tan anga,chu ser chuan i dam chhungin a zui tawh mai thei che a ni.

Mihringte hian kan tlak chham ber chu silh leh fen te,sum leh Pai te a ni lo.Fimkhurna,nun ulukna hi a ni fo.Krismas ah hian tum dang aia kan fimkhur ngaih zualna chhan a awm.
1)      Tum dang aiin thlemna a tam.Fimkhur ang u.

2)      I duh zawng leh chak zawng,nuam i tih zawng takin,mahse i tana tha hauh silo in thlemna a lo kal ang.

3)      Ni danga melh pawh i melh that peih loh,sual tih na kawngka zau takin ain hawng dawn,fimkhur ang che.

Ti hian khawvel chu a kal ngaiin a kal muah muah reng dawn a.He Krismas lo thleng tur pawh hi kawng hrang hrangin khawvel chuan a lo hmuak leh dawn a ni.Chutiang boruak karah chuan nang erawh chu eng kimah fimkhur la,ngun takin i hun hman mek dan chhut la,uluk takin in buatsaih la,a hnu leh dawn ran chung in.Kum thar rual a i khawvel chan ve rawih ral tir mai loin Bethlehem lam hawi tlat ang che.Chutah chuan khawvel in a pek theih loh thlamuan na leh hlimna mak tak chu a awm a ni


Engtikah emaw chuan Krismas hi i hman theih loh hun a la thleng dawn.Krismas hi kan hmang chatuan dawn lo.Engtikah emaw chuan siamtu Pathian nen in hma tawn in kan la in hmu dawn a.Chutih hunah chuan mahni chanchin kan la sawi theuh dawn a ni.Chuta tan chuan i in buatsaih ang u.I duh tawkin Krismas chu chen rawh.Mahse i siamtu hre reng ang che. “Lawmna reng reng ka nei love i tihna kum te a lo thlen loh nan.

                                     

Lalpan a thu malsawm rawh se.

 

 
   
 
=> Do you also want a homepage for free? Then click here! <=